Sicrhau dyfodol S4C yn hanfodol - ond rhaid gwneud yn siwr fod lle i'r Gymraeg yn y datblygiadau newydd yn y maes cyfathrebu

Wrth ymateb i adroddiad Ofcom ar ddyfodol darlledu yng Nghymru fe ddywedodd Cymdeithas yr Iaith Gymraeg:

“Fel y mudiad a wnaeth fwy na neb i sefydlu sianel deledu Gymraeg yn y lle cyntaf mae Cymdeithas yr Iaith Gymraeg yn mynnu fod sicrhau dyfodol i S4C fel rhan o’r ddarpariaeth ddarlledu yng Nghymru yn hanfodol. Byddwn, dros yr wythnosau nesaf yn edrych yn ofalus iawn ar adroddiad Ofcom er mwyn gweld pa ddewisiadau sy’n fwyaf addas ar gyfer sicrhau dyfodol i’r sianel.

Ar yr un pryd yr ydym yn ymwybodol fod darlledu wedi newid llawer ers yr 80au ac mae’n bwysig fod y Gymraeg yn ennill ei lle ar y gwasanaethau newydd sy’n datblygu fel gorsafoedd radio lleol fel Radio Sir Gaerfyrddin, ac ar y we.

“Un peth sydd yn achosi pryder i ni fel mudiad ydy na fedrwn ymddiried yn Ofcom i warchod buddiannau’r Gymraeg yn y maes darlledu yng Nghymru. Fel y dangoswyd ar y ‘Byd ar Bedwar’ yn ddiweddar fe fethodd Ofcom a gwneud hyn yng nghyd-destun Radio Sir Gaerfyrddin. Mae sicrhau dyfodol y Gymraeg ym maes teledu yn mynd i fod yn dipyn mwy o sialens iddynt.”

Mwy yn yr un categori(au): Darlledu | Newyddion
.