Deddf Iaith - Dyma'r Cyfle!

3.30pm - Mehefin 1af
Yr Eglwys Norwyaidd - Bae Caerdydd

Cyfarfod Cyhoeddus i drafod oblygiadau sefydlu'r Dyfarnydd Iaith ynghyd a'r cyfle newydd i bwyso am Ddeddf Iaith Newydd.

Siaradwyr:
Yr Athro Colin Williams
Catrin Dafydd
Sian Howys
Huw Lewis

Mae’r cyfarfod yn dilyn y Fforwm Genedlaethol ar Ddeddf Iaith a drefnwyd gan Gymdeithas yr Iaith Gymraeg yn Aberystwyth ar Fawrth 12fed. Bwriad Cymdeithas yr Iaith Gymraeg drwy gyfrwng y cyfarfodydd hyn yw pwyso ar Lywodraeth y Cynulliad i gyflwyno Deddf Iaith gryfach. Daeth y cyfle i wneud hynny oherwydd bwriad llywodraeth y Cynulliad i ddiddymu Bwrdd yr Iaith Gymraeg a sefydlu Dyfarnydd Iaith. Bydd hyn yn gofyn am ddeddfwriaeth newydd a rhaid manteisio ar y cyfle sy’n cael ei gynnig i fynnu Deddf Iaith gynhwysfawr.

Yn y Fforwm Genedlaethol a drefnwyd gennym yn Aberystwyth ar Fawrth 12ed gwnaeth Meri Huws, Cadeirydd Bwrdd yr Iaith Gymraeg y sylw arwyddocaol ‘nad oedd cwestiwn ynghylch pa un a fyddai Deddf Iaith a’i peidioond yn hytrach pa fath o Ddeddf Iaith?’ Oddi ar hynny yn y cylchgrawn ‘Golwg’ mae Meri Huws eto wedi galw am adolygiad o’r Ddeddf Iaith.

Mae’n bwysig nodi hefyd fod Hywel Williams Aelod Seneddol Arfon wedi paratoi drafft Fesur Deddf Iaith gafodd ei gyflwyno yn y Fforwm Genedlaethol ym Mis Mawrth ac fe fydd Cymdeithas yr Iaith Gymraeg yn cyflwyno dogfen drafod newydd yn y cyfarfod yn yr Eglwys Norwyaidd sy’n seiliedig ar y trafodaethau a gafwyd yn y FForwm Genedlaethol.

Ychydig iawn o amser sydd gennym os ydym am gael y maen i’r wal a sicrhau o’r diwedd Ddeddf Iaith deilwng. Dyna pam yr ydym yn erfyn arnoch i gefnogi’r cyfarfod hwn yn yr Eglwys Norwyaidd ym Mae Caerdydd fel eich bod yn gallu cyfrannu i’r drafodaeth bwysig hon.

Pwysa yma i ddarllen mwy am Ddeddf iaith Newydd

Mwy yn yr un categori(au): Deddf Iaith | Eisteddfodau | Morgannwg Gwent
.