Methiant arall gan Heddlu De Cymru i ddarparu gwasanaeth Cymraeg

Nid y ffordd mwyaf delfrydol i dreuilo prynhawn dydd Sul gyda hymdingar o benmaenmawr ond es i a Angharad Elen draw am dro i Orsaf Heddlu Canol Caerdydd prynhawn 'ma.

Yn dilyn ei gweithred drod Deddf Iaith Newydd ddechrau mis Rhagfyr llynedd, rhyddhawyd Angharad ar fechniaeth ac heb ei chyhuddo gan Heddlu De Cymru.

Termau'r fechniaeth oedd nad oedd hi i fynd yn agos na 200 medr at unrhyw adeilad y Llywodraeth (ma adeiladau'r Llywodraeth yn cynnwys canolfannau gwaith - lwcus bod hi ddim ar y dol!) ac ei bod hi i ildio ei hyn i'r Swyddfa Heddlu Ganolog yng Nghaerdydd ar y 15ed o Ionawr am 2pm.

Pan aeth Angharad at y ddesg i gyflwyno ei hyn dwedwyd nad oedd y swyddog a'i harestiodd hi ym Mis Tachwedd yn gallu siarad Cymraeg a nad oedd neb yna yn siarad Cymraeg. Mae Angharad bellach yn byw yn Llandwrog ger Caernarfon ac roedd hi wedi teithio'r holl ffordd i Gaerdydd er mwyn ildio ei hun fel a orchymwyd gan Heddlu De Cymru. Roedden nhw yn gwbod yn iawn ei bod hi yn gorfod bod yn bresennol yna heddiw, ond nid oeddent wedi paratoi unrhywbeth o gwbwl a dywedodd y Sarjant oedd ar ddyletswydd y byddai'n rhaid iddi ddychwelyd rhywbryd eto!!! Esboniodd Angharad ei bod yn byw bron 200 milltir i ffwrdd a dywedodd yr Heddwas y gallai ddychwelyd ar y 4ydd o Fawrth!

Fe fydd hyn yn 4 mis wedi'r 'drosedd' wreiddiol. 4 mis o fod ar fechniaeth. 4 mis o aros am gyhuddiad. Mae'r peth yn wrthun!

Fe fydd Angharad yn gwneud cwyn swyddogol i Brif Gwnsabl Heddlu De Cymru am ei methiant i ddelio gyda hi yn brydlon ac am ei methiant i ddarparu gwasanaeth yn y Gymraeg.

Bydd hi hefyd yn codi'r mater hyn yn ei achos llys (fydd eleni, gobeithio!) ac am y ffaith iddi hi dderbyn taflen fechniaieth uniaith Saesneg.

Hyn i gyd yn dilyn addewidion Andy Morgan, Prif Arolygydd Heddlu De Cymru, ddiwrnodau yng nghynt y byddwn ni'n gweld, "Newid dyddiol o ran agwedd" gan Heddlu De Cymru tuag at y Gymraeg.