Deddf Iaith Newydd – Rhaid i’r Llywodraeth ddechrau gwrando!

Am 2pm heddiw, ar faes yr Eisteddfod Genedlaethol, cynhaliodd Cymdeithas yr Iaith Gymraeg rali brotest yn galw am Ddeddf Iaith Newydd. Dechreuodd y brotest tu allan i uned Cymdeithas yr Iaith, lle cafwyd anerchiad gan Dafydd Iwan, llywydd Plaid Cymru, cyn i'r dorf orymdeithio draw at uned y Blaid Lafur.

Yn digwydd bod yno ar y pryd roedd nifer o ffigyrau amlwg o'r blaid, gan gynnwys Carwyn Jones (AC), John Griffiths (AC), Betty Williams (AS), Sian James (AS) a Paul Flynn (AS).

Meddiannwyd yr uned am gyfnod gan aelodau a chefnogwyr o Gymdeithas yr Iaith. Ond dihangodd y gwleidyddion gan wrthod trafod y mater gyda aelodau o'r dorf. Yr unig un a arhosodd ar ol i wrando oedd Paul Flynn.

Wrth annerch y rali, dywedodd Catrin Dafydd, arweinydd yr ymgyrch dros Ddeddf Iaith Newydd:

“Dros y flwyddyn ddiwethaf, gwelwyd consensws yn datblygu o blaid yr angen am Ddeddf Iaith Newydd. Mae hwn yn gonsensws sy’n cwmpasu Cymdeithas yr Iaith, Bwrdd yr Iaith Gymraeg, Plaid Cymru, Y Rhyddfrydwyr a’r Ceidwadwyr, nifer o fudiadau iaith ac hefyd unigolion allweddol megis John Elfed Jones a’r Arglwydd Gwilym Prys Davies – aelod blaenllaw o’r Blaid Lafur.”

“Er gwaethaf hyn, mae un sefydliad allweddol yn parhau i wrthod cymryd unrhyw ran ystyrlon yn y drafodaeth bwysig hon. Dro ar ôl tro, mae Rhodri Morgan, Alun Pugh ac aelodau eraill o Lywodraeth Lafur y Cynulliad wedi gwrthod ystyried yr angen am Ddeddf Iaith Newydd. Am hynny, bydd Cymdeithas yr Iaith Gymraeg yn parhau i ymgyrchu nes gwyn y maen i’r wal.”

Welsh Official status call by campaigners, Evening Post, Awst 11 2006
Protest puts Welsh case, Daily Post, Awst 11 2006

Mwy yn yr un categori(au): Deddf Iaith | Eisteddfodau | Morgannwg Gwent | Newyddion
.