Cymdeithas yr Iaith ar daith dros Ddeddf Iaith

Yfory Dydd Mercher Awst 16 bydd Cymdeithas yr Iaith Gymraeg yn mynd i Bontypridd i gasglu enwau ar y ddeiseb Deddf Iaith. Bydd aelodau yn ymgasglu wrth Glwb y Bont ym Mhontypridd am 11 o'r gloch y bore ac yn casglu enwau hyd at 3 o'r gloch y prynhawn.

Mae'r ymweliad a Phontypridd yn rhan o daith y Gymdeithas drwy Gymru. Cychwynodd y daith yn Abertawe dydd Llun a heddiw mae'r Gymdeithas yn Rhydaman.

Abertawe

Rhydaman

Pontypridd

Yfory bydd y Gymdeithas yn ymweld a Phontypridd. Bydd yng Nghaerdydd dydd Iau, Casnewydd dydd Gwener ac Aberystwyth dydd Sadwrn.

Yn yr wythnos ganlynol bydd y Gymdeithas yn ymweld a Rhuthun, Llangefni, Pwllheli, Caernarfon, Dolgellau ac Aberteifi.

Dywedodd Osian Rhys sydd yn gyfrifol am y trefniadau ym Mhontypridd:

"Cafodd y Gymdeithas wythnos lwyddianus iawn yn yr Eisteddfod Genedlaethol. Cynhaliwyd cyfarfod gwirioneddol hanesyddol ym Mhabell y Cymdeithasau ar y dydd Mercher pan gafwyd tair o'r pedair prif blaid yng Nghymru i ddatgan cefnogaeth i Ddeddf Iaith."

"Cafwyd protest effeithiol yn erbyn y Blaid Lafur ar y Maes oherwydd ei diffyg cefnogaeth i'r ymgyrch ac fe gasglwyd miloedd o enwau ar y ddeiseb sy'n galw am Ddeddf Iaith. Hefyd fe fanteisiodd y Gymdeithas ar y cyfle i i lansio drafft fesur Deddf Iaith gan wthio'r ymgyrch ymlaen yn sylweddol."

"Yn awr dyma'n cyfle i fynd allan at y bobl yn eu cymunedau lleol i ofyn iddynt am eu cefnogaeth hwy."�

Manylion y Daith

Manylion y Ddeiseb

Ar faes Eisteddfod yr Urdd yn Rhuthun ym Mis Mai 2006 fe lansiwyd Deiseb Genedlaethol dros Ddeddf Iaith Newydd.

Mae'r Deiseb yn galw ar Lywodraeth Cynulliad Cymru i sicrhau Deddf Iaith Newydd fydd yn sefydlu statws swyddogol a Chomisiynydd i'r Gymraeg, ynghyd â hawliau sylfaenol fydd yn rhoi cyfleoedd teg a real i bawb yng Nghymru fedru dysgu Cymraeg, derbyn addysg Gymraeg a chael eu galluogi i ddefnyddio'r Gymreg ym mhob agwedd o fywyd.

Dychweler unrhyw ddeisebion sydd wedi eu llenwi i Swyddfa Cymdeithas yr Iaith Gymraeg erbyn 1af Hydref 2006.

Mae'r ddogfen yma ar gael i'w lawrlwytho mewn PDF:

Pwyswch yma i lawrlwytho copi pdf o 'Deiseb Genedlaethol dros Ddeddf Iaith Newydd' (43KB)

I ddarllen ffeiliau PDF mae angen copi o Adobe Reader - sydd ar gael am ddim.

Mwy yn yr un categori(au): Deddf Iaith | Newyddion
.