Llafur, Ceidwadwyr a Phlaid Cymru yn anfon cynrychiolwyr i'r Cyfarfod Cyffredinol

Bydd y pleidiau gwleidyddol yn anfon cynrychiolydd i Gyfarfod Cyffredinol Cymdeithas yr Iaith Gymraeg sydd i'w gynnal yng Nghanolfan Morlan, Aberystwyth rhwng 10am a 3pm ddydd Sadwrn Mawrth 10fed. Cynrychiolwyr y pleidiau fydd Trefor Jones ymgeisydd y Blaid Geidwadol yng Ngheredigion, Elin Jones AC ymgeisydd Plaid Cymru yng Ngheredigion ac Alun Davies sydd ar ben y rhestr Llafur yng Nghanolbarth a Gorllewin Cymru.

Mae'r Democratiaid Rhyddfrydol wedi ymddiheuro am fethu ag anfon cynrychiolydd a hynny am fod ganddynt Gynhadledd yn Abertawe ar yr un diwrnod; ond mae Eleanor Burnham AC wedi anfon neges at Gyfarfod Cyffredinol y Gymdeithas ar eu rhan.

Bydd sesiwn arbennig rhwng 2pm a 3pm lle bydd dogfen ddiweddaraf y Gymdeithas 'Mesur yr Iaith Gymraeg 2007' - sydd newydd gael ei diweddaru – yn cael ei lansio. Llywydd y sesiwn hon fydd Kate Crockett a fu'n newyddiadurydd gyda'r Byd a'r Bedwar a'r BBC. Bydd llawr y Cyfarfod Cyffredinol, ar gyfer y sesiwn arbennig hon wedi ei ffurfio ar lun llawr siambr y Cynulliad Cenedlaethol gyda Kate Crockett yn chwarae rhan Llywydd y Cynulliad Cenedlaethol.

Bydd cyfle i gynrychiolwyr y pleidiau ymateb i 'Fesur yr Iaith Gymraeg 2007' ac i egluro beth fydd gan eu gwahanol faniffestos ar gyfer Etholiadau'r Cynulliad i'w ddweud ar yr iaith Gymraeg. Bydd ganddynt hefyd y cyfle i ateb cwestiynau o'r llawr.

Pwyswch yma am fwy o fanylion ynglyn a'r Cyfarfod Cyffredinol

Mwy yn yr un categori(au): Newyddion
.