Protest Tesco Port

Cafwyd protest lwyddiannus iawn ym Mhorthmadog dydd Sadwrn, lle gwnaeth criw sylweddol o aelodau o'r Gymdeithas rwystro mynediad Tesco am ryw hanner awr. Cafodd Steffan Cravos, sydd wrth gwrs yn gyn-Gadeirydd ei arestio am godi poster ar ffenest Tesco, ond cafodd ei ryddhau yn ddi-gyhuddiad yn fuan wedi hynny. Cafwyd araith rymus gan Gwenno Teifi hefyd, rhyw dri diwrnod wedi iddi gael ei rhyddhau o'r carchar am baentio slogan ar ffenest cwmni Brantano fel rhan o'r ymgyrch dros ddeddf iaith newydd.

Yn ol datganiad gan Tesco yndilyn y brotest yr oeddynt wedi 'synnu' gan ein protest, gan fod nifer fawr o arwyddion dwyieithog yn y gangen. Dyma'r fath o agwedd sydd wedi cael ei feithrin yn y sector briefat dros y degawd diwethaf. Os oes arwyddion dwyieithog fan hyn a fan draw, gallwn barhau i weithredu ein busnes difrifol trwy gyfrwng y Saesneg. Mae'n rhaid i gwmniau fel Tesco sylweddoli fod angen i ddwyieithrwydd ymdreiddio trwy eu holl weithgaredd - arwyddion dros dro, taflenni gwybodaeth, hyfforddiant staff, cyhoeddiadau uchel-seinydd ac ati, dyw'r agwedd docenistig bresennol ddim yn ddigonol, ac yn sicr ddim yn dangos parch ac ymrwymiad at boblogaeth y cymunedau y maent yn gwneud cymaint o elw ohonynt.

Mae'r gwaith o bwyso ar Tesco yn parhau dros yr haf. Os ydych chi am gyfrannu, ewch i'ch cangen leol a chasglu tystiolaeth o'r angen am ddeddf iaith newydd (e.e. taflenni uniaith Saesneg ac ati) a dewch a nhw i uned Cymdeithas yr Iaith yn yr Eisteddfod Genedlaethol. Yn ogystal, llenwch y ffurflenni cwyno sydd i'w cael ymhob cangen gan ddweud eich bod yn dymuno gwasanaeth trwy gyfrwng y Gymraeg.

Diolch yn fawr i bawb ddaeth draw i Borthmadog dydd Sadwrn.

Mwy yn yr un categori(au): Blog Hywel
.