Meddiannu Mynydd Cerrig

Am 6 o'r gloch bore 'ma (wel, bore ddoe erbyn hyn!), meddiannwyd un o adeiladau Ysgol Mynydd Cerrig yn Sir Gaerfyrddin gan bump o aelodau Cymdeithas yr Iaith - Iestyn ap Rhobert, Angharad Clwyd, Ffred Ffransis, Siriol Teifi a minnau. Bwriad y weithred oedd i brotestio, ar y diwrnod y dylai plant y pentref fod wedi dychwelyd i'w hysgol leol, yn erbyn yr ymgynghoriad twyllodrus ac annemocrataidd a weithredwyd gan Gyngor Sir Gar. Mae'n anodd iawn credu yn nidwylledd ymgynghoriad pan fo'r Cyngor wedi cynnwys arian o werthu adeilad yr ysgol mewn cyllideb cyn i'r ymgynghoriad hwnnw ar ddyfodol yr ysgol orffen.

Yn ogystal,, lansiwyd papur polisi newydd Cymdeithas yr Iaith ar addysg gynradd, sef 'Rhesymoli Cadarnhaol.' Prif ffocws y papur yw ein galwad ar i'r cyfrifoldeb dros adeiladau addysgiadol gael ei drosglwyddo i adran Materion Gwledig y Cynulliad, a bod yr awdurdod lleol wedyn yn rhentu yn ol faint bynnag o ofod y mae ei angen i redeg ysgol gynradd. Byddai modd i weddill yr adeilad gael ei ddefnyddio fel adnodd cymunedol, gan sicrhau canolfan bentrefol a chymunedol hyfyw, a gan sicrhau bod safon addysgiadol uchel yn parhau i gael ei ddarparu ym mhentref lleol y plant. Dyma ymgais Cymdeithas yr Iaith i symud y ddadl ynglyn a dyfodol ysgolion pentrefol yn ei blaen, ac i gynnig atebion amgen a newydd, rhywbeth y mae Cyngor Sir Gar yn gwbwl anfodlon i wneud.

Daeth y brotest i ben am 4.30 y prynhawn, ar ol dros 10 awr o ddarllen, Scrabble (cymraeg, yn naturiol!!), a chardiau. Gobeithio bod y weithred yma wedi deffro cymunedau eraill Sir Gar a Chymru i'r perygl a'r bygythiad sydd yn hongian uwch eu pennau o du'r Cyngor Sir.

Mwy yn yr un categori(au): Blog Hywel
.