Dweud ein dweud wrth Geidwadwr!

Prynhawn ddoe aeth Rhun Emlyn (cadeirydd y grwp Deddf Iaith) aminnau i swyddfa etholaeth y Ceidwadwyr yn Hwlffordd i drafod ein galwad am ddeddf iaith nwewydd gyda llefarydd y Ceidwadwyr Cymreig ar yr iaith yn y Cynulliad, Paul Davies AC. Cadarnhaodd nad oedd eu polisi ar yr iaith wedi newid ers cyn yr etholiad, hynny yw eu bod yn cefnogi ein galwadau am wneud yr iaith Gymraeg yn iaith swyddogol, ac am sefydlu swydd y Comisiynydd Iaith. Cafwyd trafodaeth drylwyr ar ein Mesur Iaith ni, a gyhoeddwyd yn ein Cyfarfod Cyffredinol ym mis Mawrth. Y prif bwynt a drafodwyd oedd trydydd prif ffocws ein galwad, sef sefydlu hawliau i bobl Cymru ddefnyddio'r iaith ar draws pob sector ac ymhob rhan o fywyd. Cafwyd ymateb cadarnhaol o ran yr egwyddor o sefydlu'r hawliau yma, a thrafodaeth fanwl ar ochr ymarferol gosod rheidrwydd ar fusnesau i gynnig gwasanaeth yn Gymraeg. Yn ol y disgwyl, effaith y fath ddeddfwriaeth ar fusnesau bychain oedd ei brif bryder, ond credaf inni allu esbonio ein gweledigaeth ni o ran rhoi cymorth i fusnesau bychain trwy osod fframwaith amser rhesymol a chynnig buddiannau treth, tra yn dal at ein gweledigaeth egwyddorol y dylai bob busnes yng Nghymru gynnig gwasanaeth ddwyieithog. Roedd yn sicr yn gyfarfod gwerthfawr, ac mi oedd Paul Dvies yn awyddus iawn i gyfarfod gyda ni yn gyson ac i gadw'r drafodaeth yn agored. Rydyn ni wrthi'n trefnu cyfarfod gyda'r Gweinidog Diwylliant, Rhodri Glyn Thomas, a'r Democratiaid Rhyddfrydol i sicrhau fod unrhyw fesur sy'n cael ei gyflwyno yn y Cynulliad yn un gynhwysfawr ac effeithiol

Mwy yn yr un categori(au): Blog Hywel
.