PROTEST: Morrisons, Aberystwyth

Protest Morrisons Aberystwyth
2.30pm, Sadwrn Rhagfyr 1.

DEDDF IAITH NEWYDD - DYMA'R CYFLE!

Mae Cymdeithas yr Iaith yn protestio yn erbyn Morrisons fel rhan o'r ymgyrch dros Ddeddf Iaith Newydd. Nid yw'r sefyllfa bresennol ddigon da gan nad oes statws swyddogol gan yr iaith na chwaith hawl gan ei siaradwyr i gael gwasanaethau yn y sector breifat yn eu hiaith eu hunain.

Rydym yn dibynnu yn llwyr ar ewyllys da cwmnïau unigol ac er bod hyn wedi darparu rhywfaint o gydnabyddiaeth symbolaidd i'r Gymraeg mae'r sefyllfa'n parhau yn hollol annigonol. Mewn byd delfrydol mi fuasai cwmnïau yn darparu gwasanaeth Cymraeg o'u hewyllys eu hunain ond mae'r pymtheg mlynedd diwethaf wedi dangos y gwirionedd anffodus na wnaiff cwmnïau ddarparu'r gwasanaeth os nad oes raid iddynt. Mae Cymdeithas yr Iaith yn galw am Ddeddf Iaith fuasai'n:

· rhoi statws swyddogol i'r iaith Gymraeg
· rhoi hawliau sylfaenol i siaradwyr Cymraeg gael gwasanaethau yn yr iaith ym mhob sector
· rhoi hawliau sylfaenol i weithwyr gael defnyddio'r iaith yn y gweithle
· sefydlu comisiynydd fuasai'n amddiffyn buddiannau'r iaith a'i siaradwyr

Mae'r Gymdeithas wedi trafod gyda Morrisons ers peth amser ac maent wedi addo gwneud nifer o newidiadau ond nid ydynt wedi gweithredu ar y rhain. Yr ydym wedi gofyn i Morrisons ddarparu:

1. Arwyddion parhaol dwyieithog
2. Posteri / taflenni dwyieithog
3. labeli cynnyrch eu hunain yn ddwyieithog
4. Adran o'r wefan yn Gymraeg
5. Cynnyrch lleol ar werth
6. Cyhoeddiadau uchelseinydd dwyieithog
7. Hyfforddiant yn y Gymraeg i'r staff

Mae'r iaith Gymraeg yn perthyn i ni i gyd fel Cymry, boed siaradwyr Cymraeg neu beidio, ac yn rhywbeth i ymfalchïo ynddi a'i gwarchod. Yn ogystal, dylai'r gallu i ddefnyddio'ch iaith eich hun yn eich gwlad eich hun fod yn hawl sylfaenol.

Mae'r ymgyrch wedi derbyn cefnogaeth eang oddi wrth grwpiau a mudiadau gwahanol dros Gymru a chan nifer o'r pleidiau gwleidyddol hefyd, ond mae'n rhaid i ni ofalu na chawn ddeddf wan ac aneffeithiol ond deddf sydd am wneud gwahaniaeth ac am roi'r parch a'r hawliau dyledus i'r Gymraeg a'i siaradwyr.

DEDDF IAITH NEWYDD - DYMA'R CYFLE!

Mwy yn yr un categori(au): Ceredigion | Deddf Iaith
.