Lle Canolog i Ddeddf Iaith yn y Cyfarfod Cyffredinol - Beirniadu WRU

Fe neilltuir lle arbennig i Ddeddf Iaith yng Nghyfarfod Cyffredinol Cymdeithas yr Iaith Gymraeg eleni. Cynhelir y Cyfarfod Cyffredinol yng Nghanolfan Morlan, Aberystwyth dydd Sadwrn Chwefror 2 rhwng 10am a 3.30pm. Cynhelir gem rygbi rhyngwladol yn Twickenham rhwng Cymru a Lloegr yn syth wedi'r Cyfarfod am 4pm.

Amserlen llawn y Cyfarfod Cyffredinol ar gael yma.

Dywedodd Dafydd Morgan Lewis, Swyddog Gweinyddol Cymdeithas yr Iaith Gymraeg:

"Mae'n fwriad gan y Gymdeithas anfon llythyr o'r Cyfarfod Cyffredinol at swyddogion Undeb Rygbi Cymru yn cwyno am ddiffyg ymrwymiad yr Undeb i'r iaith Gymraeg. Yr ydym yn cwyno yn arbennig nad oes air o Gymraeg ar wefan yr undeb ac mae'r defnydd o'r Gymraeg mewn meysydd eraill yn wan ac aneffeithiol."

"Yr hyn sy'n gwneud y sefyllfa'n waeth yw bod rygbi yn un o'r enghreifftiau prin lle cynrychioli'r Cymru ar y maes rhyngwladol. Fe fyddem felly yn disgwyl llawer mwy o ymdrech gan Undeb Rygbi Cymru i roi delwedd ddwyieithog i'w gweithgareddau. Os na fydd newid sydyn yn y sefyllfa yr ydym yn rhagweld y bydd Undeb Rygbi Cymru yn un o brif dargedau Cymdeithas yr Iaith Gymraeg yn y dyfodol agos."

Bydd cynigion arbennig yn y Cyfarfod Cyffredinol yn galw:

1. ar i Lywodraeth y Cynulliad gyflwyno Deddf Iaith Newydd

2. fod y sector breifat, gan gynnwys cwmniau fel Tesco, Morrisons, Orange, Abbey, Boots, Brains yn cael eu cynnwys yn y mesur iaith arfaethedig

3. ar i'r Gweinidog Iechyd i sicrhau gwasanaeth Cymraeg cyflawn yn y Gwasanaeth Iechyd, ac yn datgan fod angen Cymreigio y Gwasanaeth Iechyd Gwladol a bod y preifateiddio sy'n digwydd yn y gwasanaeth hwnnw yn milwrio yn erbyn y Gymraeg.

Pwyswch yma i lawrlwytho'r Cynigion (pdf)

Mwy yn yr un categori(au): Ceredigion | Cyf Cyff (gynt) | Deddf Iaith | Newyddion
.