Colli Tryweryn - Colli Ysgolion - Colli Iaith

Cychwynodd Taith Gerdded Cymdeithas yr Iaith dros Ysgolion Pentrefol Gwynedd heddiw gan gerdded o Ysgol y Parc (un o’r rhai cyntaf sy tan fygythiad) at y Capel Coffa ar lan Llyn Celyn. Bu cyfarfod byr am yn y Capel i gofio Tryweryn ac i ymdynghedu i frwydro i beidio a cholli chwaneg o gymunedau Cymraeg o ganlyniad i golli ysgolion.

Arweiniwyd y cerddwyr gan drefnydd y Gymdeithas yn y Gogledd, Osian Jones, a esboniodd:

"Byddai cau ysgolion fel y Parc yn golygu dedfryd ohiriedig o farwolaeth ar y gymuned Gymraeg leol. Byddai’r gymuned yn heneiddio gan na byddai rhieni ifainc mor barod i fyw mewn cymuned heb ysgol."

"Collwyd cymuned Gymraeg o ganlyniad i golli Tryweryn, ond fe allem ni golli llawer yn fwy o gymunedau Cymraeg os na bydd gwrthwynebiad cryf i gynllun presennol Cyngor Gwynedd. Digalon oedd colli Tryweryn, ond mae cofio Tryweryn yn ein cryfhau i wynebu brwydr newydd."

Roedd y gantores enwog, Heather Jones, yn canu'r gan 'Colli Iaith' yn y Capel Coffa ac yn hwyrach bydd cyngerdd gyda’r plant lleol yn Ysgol y Parc am 7pm (Nos Lun).

Pwyswch yma am fanylion y daith

Mwy yn yr un categori(au): Addysg | Gwynedd Môn | Newyddion
.