Dadl Ysgolion Pentrefol yn y Cynulliad Heddiw

Galwad am gymryd o ddifri effaith cau ysgolion ar yr iaith

Ar y diwrnod y trafodir y pwnc yn y siambr, mae Cymdeithas yr Iaith wedi galw ar swyddogion y Cynulliad i ymchwilio o ddifri i effaith cau ysgolion pentre’ ar yr iaith ac i roi heibio’r astudiaethau arwynebol presennol.

Gan siarad o flaen y cynnig gan y Ceidwadwyr y dylai Llywodraeth y Cynulliad drefnu asesiad ardrawiad iaith cyn y caeir unrhyw ysgol, dywedodd Ffred Ffransis (llefarydd y Gymdeithas ar addysg),

"Ar hyn o bryd y mae swyddogion y Cynulliad yn ymfodloni ar un frawddeg o asesiad o’r effaith ar yr iaith. Dywedir fod cyfle i blant ysgol sy’n cau cael eu trosglwyddo i ysgol arall Gymraeg ei chyfrwng ac nad oes problem. Anwybyddir y ffaith fod disgyblion - ac yn enwedig plant mewnfudwyr - yn gweld y Gymraeg wedyn yn gyfrwng academaidd yn unig yn hytrach nag yn gyfrwng mynediad i’r gymuned y maent wedi dod yn rhan ohoni. Anwybyddir effaith colli’r ymdeimlad o berthyn i gymuned Gymraeg ymhlith y plant a’r rhieni ifainc sydd wedyn yn dilyn eu plant i weithgareddau yn y gwahanol ysgolion newydd. Anwybyddir effaith fod cymuned bentrefol Gymraeg arall yn heneiddio a holl ddeinameg cyfathrebu cymuned Gymraeg. Mae’n bryd gymryd y pwnc o ddifri a sicrhau asesiadau proffesiynol o’r effaith ar yr iaith ac ar gymunedau lleol o gau ysgolion.”

Mwy yn yr un categori(au): Addysg | Newyddion
.