Gweithredu yn erbyn Morrisons Caernarfon

Cynhaliwyd protest gan aelodau Cymdeithas yr Iaith yn siop Morrisons Caernarfon Dydd Sadwrn, (Mai 3ydd 2008). Ail gyflwynwyd taflenni uniaith Saesneg y cwmni yn ôl iddynt mewn pentwr mawr wrth fynedfa'r siop. Aeth aelodau ymlaen wedyn i geisio tynnu arwydd mawr uniaith Saesneg i lawr o'r tô. Gosodwyd hefyd sticeri'n datgan “Ble mae'r Gymraeg” ar draws y siop. Cafodd yr heddlu eu galw, ond ni chafodd unrhyw un eu harestio.

Dywedodd Bethan Williams, Cadeirydd grŵp Deddf Iaith Cymdeithas yr Iaith, yn dilyn y brotest:

"Rydym ni’n targedi'r cwmnïau hynny sydd yn cymryd arian pobl Cymru, ond yn gwrthod cynnig gwasanaeth cyflawn trwy gyfrwng y Gymraeg. Rydym yn galw ar bobl Cymru i lunio llythyr o gŵyn i'w ddanfon at y cwmnïau yma ynglŷn â'u polisi iaith ddiffygiol."

"Rydym yn galw ar y cwmnïau yma i sicrhau bod pob arwydd parhaol, deunydd marchnata tymhorol ac arwyddion dros dro, cyhoeddiadau system sain a phecynnau cynnyrch ei hunain yn ddwyieithog. Galwn hefyd arnynt i ddefnyddio cynnyrch lleol lle bo hynny'n bosibl a sefydlu cynlluniau hyfforddi staff i'w galluogi i weithio a chynnig gwasanaeth trwy gyfrwng y Gymraeg."

Ychwanegodd Mair Evans Swyddog o’r Gymdeithas yn Rhanbarth Gwynedd Môn:

“Mewn cyfarfod ar ôl cyfarfod mae cwmni Morrisons wedi addo dilyn camau pendant tuag at ddilyn polisïau dwyieithog. Hyd yn hyn nid yw unrhyw un o'r camau hyn wedi eu gwireddu. Oherwydd llusgo traed cyson felly, fe wnaethom ni weithredu yn erbyn Morrisons er mwyn dangos difrifoldeb y sefyllfa. Dyma gwmni sy'n mygu cymunedau Cymru heb ddangos nemor ddim parch i'r cymunedau hynny.”

“Mae'r Gymdeithas yn fodlon sefyll yn erbyn apathi llwyr y cwmni yma, a dangos fod dyfodol yr iaith Gymraeg yn fwy pwysig na phocedi cyfranddalwyr cwmnïau mawr.”

“Galwn ar y Cynulliad Cenedlaethol i sicrhau bod unrhyw Ddeddfwriaeth ieithyddol newydd yn cynnwys y sector breifat, gan ei bod hi’n gwbwl amlwg nad yw dibynnu ar ewyllys da yn ddigon!”

Bydd Cymdeithas yr Iaith yn awr yn troi eu sylw at Superdrug a Boots yn ystod misoedd Maia Mehedfin 2008. Pwyswch yma i weld rhestr llawn o dargedau'r Gymdeithas yn ystod y misoedd nesaf.

Mwy yn yr un categori(au): Deddf Iaith | Gwynedd Môn | Newyddion
.