Protest "Cadwn ein Hysgolion", Caernarfon

Protest Cadwn ein Hysgolion
1pm Iau 19eg Mehefin
Swyddfa Cyngor Gwynedd, Caernarfon

Mae Cymdeithas yr Iaith yn galw ar bawb sy'n rhydd i deithio i ddod i Gaernarfon o flaen cyfarfod allweddol o Gyngor Sir Gwynedd (cychwyn am 2pm). Bydd y Cyngor yn ystyried cynnig i sefydlu gweithgor i lunio polisi ad-drefnu newydd. Yn ol y Pwyllgor Craffu Addysg, rhan o swyddogaeth y gweithgor hwnnw fydd "llunio rhestr o ysgolion i'w cau". Mae'n bosibl y bydd gwelliannau i newid yr union eiriad, ond yr egwyddor sylfaenol yw nad lle unrhyw weithgor canolog o'r cyngor yw gwneud argymhellion am ba ysgolion y dylid eu cau. Gall gweithgor canolog astudio adroddiadau, gymryd tystiolaeth a hyd yn oed lunio criteria am hyfywedd ysgolion. Ond mater i'w drafod yn lleol gydag ysgolion a chymunedau yw argymhellion am dynged ysgolion unigol a'u perthynas a'i gilydd.

Mae pwysau rhieni, llywodraethwyr ac eraill wedi cael effaith mawr hyd yma ac wedi gorfodi'r Cyngor yn ymarferol i dynnu'n ol y Cynllun gwreiddiol. Rhaid sicrhau'n awr nad oes ymdrech arall i benderfynu o'r canol dynged ein hysgolion. Mae angen nid yn unig Gynllun newydd ond hefyd agwedd newydd o drafod yn agored gyda phobl leol yn lle ffurfio cynlluniau'n ganolog.

Galwn arnoch i ddod i Gaernarfon i dystio i'r ffaith fod angen i'r cynghorwyr wrando - dewch i dystio gyda baneri, swn ac yn wir trwy eich presenoldeb.

Yn Gywir,

Osian Jones (Swyddog Maes y Gogledd, Cymdeithas yr Iaith)
Ffred Ffransis (Cadeirydd Grwp Addysg, Cymdeithas yr Iaith)

Protest o flaen Siambr y Cyngor, Caernarfon
1pm, Dydd Iau, Mehefin 19 2008

Mwy yn yr un categori(au): Addysg
.