Dyfodol Newydd ar gyfer Ysgolion Pentre'

Mewn Cynhadledd i’r Wasg y bore’ma, mae Cymdeithas yr Iaith wedi tynnu sylw at y posibiliadau cyffrous newydd ar gyfer ysgolion pentrefol Cymraeg. Mae’r Gymdeithas wedi annog cyrff llywodraethol i ymateb i bapur ymgynghorol newydd Llywodraeth y Cynulliad (Rheoliadau Ffedereiddio Ysgolion) sy’n dangos sut y gall ysgolion pentre cyfagos gydweithio ar batrwm newydd, tra’n cadw eu hannibyniaeth, i greu unedau addysgol cryf fel alternatif i gau ysgolion. Gellir creu ffederasiwn o Ysgol Uwchradd a llawer o’r ysgolion cynradd pentrefol sy’n ei bwydo.

Mae nifer o Awdurdodau Lleol – fel Gwynedd a Mon – wedi ffafrio datblygiadau o’r fath ac yn debygol o’u cynnig fel opsiynau. Ar y llaw arall, ymddengys Cyngor Sir Caerfyrddin yn benderfynol o fwrw mlaen gyda chynllun “moderneiddio” o gau degau o ysgolion. Yn y Gynhadledd, heriodd y Gymdeithas Gyngor Sir Caerfyrddin i ddweud yn gyhoeddus a oedd yn bwriadu mynd ymlaen gyda’i rhaglen o gau degau ysgolion ar waethaf y posibiliadau newydd.

Meddai llefarydd y Gymdeithas ar Addysg, Ffred Ffransis, "Mae hawl gyda ni i wybod a yw Cyngor fel Caerfyrddin yn bwriadu anwybyddu’n llwyr yr holl bosibiliadau cadarnhaol newydd hyn a mynnu mynd ymlaen gyda’i bolisi dogmataidd o gau ysgolion. Fe hoffem ni gredu ein bod wedi ennill y ddadl addysgol a chymdeithasol dros ysgolion pentrefol Cymraeg. Ond cydnabyddwn fod hefyd resymau ymarferol am y newid pwyslais o blaid ysgolion pentre. Mae’r wasgfa ar gredyd yn golygu nad oes cyllid ar gael ar gyfer adeiladu ysgolion canolog newydd. Ac mae nifer o ysgolion wedi gwneud safiad dewr yn erbyn cynlluniau cau, a does gan yr Awdurdodau ddim yr adnoddau gweinyddol i drin degau o apeliadau’n erbyn penderfyniadau i gau ysgolion."

"Mae’r llanw wedi troi.Yr unig ffordd y bydd nifer sylweddol o ysgolion yn cau yn y dyfodol yw os bydd y cymunedau lleol yn digalonni wedi blynyddoedd o bwysau ac ildio. Pa fath ar Gyngor sy’n seilio’i strategaeth ar ddigalonni a churo ei bobl ei hunan ? Yn lle disgwyl cnoc ar y drws gan y Cyngor, dylai llywodraethwyr ysgolion gymryd y mater i’w dwylo eu hunain gan gysylltu ag ysgolion cyfagos a llunio eu cynlluniau eu hunain ar gyfer dyfodol addysg yn eu hardal. Am y tro cyntaf, byddai’r rheoliadau newydd hyn yn caniatau i Lywodraethwyr arwain y ffordd."

Cyhoeddwyd y Rheoliadau drafft newydd hyn gan Lywodraeth y Cynulliad yn nechrau Medi ar gyfer ymgynghori tan Hydref 24ain: http://new.wales.gov.uk/consultation/dells/2008/fedofmaintainedschools/fedofmaintainedschoolse.pdf?lang=cy

Hefyd yn y Gynhadledd i’r Wasg bu arweinydd yr Wrthblaid ar Gyngor Sir Caerfyrddin, Peter Hughes-Griffiths, yn galw am osod moratoriwm argau ysgolion yn y sir, er mwyn cael cyfle i ymgynghori'n llawn ar yr argymhelliadau newydd.

www.walesonline.co.uk

news.bbc.co.uk/welsh/

www.thisissouthwales.co.uk

Mwy yn yr un categori(au): Addysg | Newyddion
.