Croeso i adran Gwreiddiwch yn y Gymuned.

Cei weld yma y newyddion diweddaraf, yr holl ddigwyddiadau sydd ar y gweill, yn ogystal a'r holl ddogfennau ac erthyglau sy’n berthnasol i'r ymgyrch Gwreiddiwch yn y Gymuned.

Beth yw Ymgyrch Gwreiddiwch yn y Gymuned?

Yn nhyb Cymdeithas yr Iaith, mae dyfodol yr iaith Gymraeg, fel iaith fyw, yn mynd law yn llaw gyda’n gallu i adeiladu cymunedau cynaladwy - mewn ardaloedd gwledig a threfol - ym mhob rhan o Gymru. Mae sicrhau bod yr economi leol yn cyfrannu tuag at ffyniant cymunedau a’u gallu i reoli eu dyfodol eu hunain yn hanfodol yn hyn o beth.

Mae’r pwyslais presennol ar ganoli gweinyddiaeth a swyddfeydd wedi arwain at golli nifer o swyddi lleol. Ymhellach, mae’r twf di-rwystr yn nylanwad nifer o gwmniau mawr, megis yr archfarchnadoedd, wedi niweidio seiliau cynhenid yr economi leol. Golyga hyn, fod y cyfoeth yn ogystal â’r grym, yn llifo i ffwrdd o’r gymuned.

Ymgyrch newydd yw ymgyrch Gwreiddiwch yn y Gymuned sy’n cael ei llywio gan grŵp a sefydlwyd yn sgil cynnig i Gyfarfod Cyffredinol y Gymdeithas ym mis Mawrth 2004. Mae’r broses o osod nodau penodol i’r ymgyrch ar y gweill ond rhagwelir y byddwn yn gweithredu ar sawl ffrynt, megis:

• Ymgyrchu i sicrhau bod gwariant a chymorthdaliadau awdurdodau lleol a chyrff cyhoeddus eraill yn cyfrannu cymaint â phosibl at ffyniant cymunedau lleol.
• Pwyso am asesiadau o impact datblygiadau megis archfarchnadoedd newydd ar gymunedau lleol a rhagolygon y Gymraeg.

• Gwreiddiwch Yma i Werthu Yma – lle bydd cwmnïau mawr yn sefydlu neu eisoes mewn ardal yn gwerthu nwyddau a gwasanaethau, pwyso ar iddynt weithio mewn ffordd sy’n rhoi budd i’r cymunedau lleol e.e. gwerthu cynnyrch lleol, defnyddio gwasanaethau lleol, gwasanaethu eu canghennau yng Nghymru o ddepots a swyddfeydd gweinyddol Cymreig, parchu hawliau’r gymuned leol i gael gwaith ar amodau teg a gwasanaeth yn y Gymraeg.

Beth gelli di wneud?

Rho wybod os oes unrhyw enghraifft amlwg yn dy ardal di o ddatblygiad fydd yn tynnu arian o’r economi leol, neu os gwyddost am gwmni neu gorff cyhoeddus sy’n anwybyddu cyflenwyr nwyddau a gwasanaethau lleol gan ganiatâu i arian lifo allan o’r economi leol.

Ymuna yn yr Ymgyrch

Er mwyn cyfrannu at yr ymgyrch, darganfod beth yw'r camau nesaf, ymaelodi â’r grwp Gwreiddiwch yn y Gymuned cysyllta â (Cadeirydd Grwp Gwreiddiwch yn y Gymuned).